ស.រ.អា ៖ ប្រធានាធិបតីអាមេរិក លោក ដូណាល់ ត្រាំ កាលពីថ្ងៃទី១៩ ខែសីហា បានថ្លែងថា លោកកំពុងចាប់ផ្តើមយុទ្ធនាការធំថ្មីមួយដើម្បីតម្រង់ទិសដៅលើសេដ្ឋកិច្ចរបស់អ៊ីរ៉ង់ ដោយបានគំរាមដាក់ទោសទណ្ឌ «យ៉ាងធ្ងន់ធ្ងរ» លើប្រទេសទាំងឡាយណាដែលជួយ ឬធ្វើអាជីវកម្មជាមួយសាធារណរដ្ឋអ៊ីស្លាមមួយនេះ។
យុទ្ធនាការបង្កើនសម្ពាធសេដ្ឋកិច្ចយ៉ាងខ្លាំងក្លានេះ បានកើតឡើងនៅពេលដែលសង្គ្រាមជិតឈានចូលដល់ខែទី៦ដោយមិនទាន់មានដំណោះស្រាយការទូត ឬយោធាភ្លាមៗណាមួយឡើយ។ លោកត្រាំក៏កំពុងប្រឈមមុខនឹងការពិនិត្យតាមដានផ្នែកនយោបាយក្នុងស្រុកជាថ្មីជុំវិញសង្គ្រាមនេះផងដែរ ខណៈដែលការបោះឆ្នោតក្នុងខែវិច្ឆិកាកំពុងតែខិតជិតមកដល់យ៉ាងឆាប់រហ័ស។
លោកត្រាំបានសរសេរនៅលើបណ្តាញសង្គម Truth Social ថា «ថ្ងៃនេះ ខ្ញុំសូមប្រកាសអំពីប្រតិបត្តិការសេដ្ឋកិច្ចដ៏ខ្ទេចខ្ទីបំផុតមិនធ្លាប់មានប្រឆាំងនឹងរាល់ប្រទេសទាំងឡាយ! នេះនឹងក្លាយជាសង្គ្រាមសេដ្ឋកិច្ច និងការផាត់ចេញឱ្យនៅឯកោក្នុងកម្រិតមួយដែលមិនធ្លាប់មានពីមុនមក»។
លោកបានបន្ថែមថា «ខ្ញុំក៏សូមប្រកាសផងដែរថា ប្រទេសណាក៏ដោយដែលអនុញ្ញាតឱ្យគ្រឹះស្ថានហិរញ្ញវត្ថុ អាជីវកម្មអាកាសយានដ្ឋាន ឬអង្គភាពរដ្ឋាភិបាលរបស់ខ្លួន ផ្តល់ជំនួយសង្គ្រោះ ឬការគាំទ្រណាមួយដល់អ៊ីរ៉ង់ នោះនឹងត្រូវប្រឈមមុខនឹងផលវិបាកសេដ្ឋកិច្ចយ៉ាងធ្ងន់ធ្ងរ»។ លោកមិនបានបញ្ជាក់លម្អិតថាប្រទេសទាំងនោះនឹងត្រូវប្រឈមមុខនឹងទោសទណ្ឌអ្វីខ្លះនោះទេ ហើយក៏មិនបានបញ្ចេញឈ្មោះប្រទេសណាមួយក្រៅពីអ៊ីរ៉ង់នោះដែរ។
ការអត្ថាធិប្បាយរបស់ប្រធានាធិបតីរូបនេះ បានធ្វើឡើងជិតមួយសប្តាហ៍ បន្ទាប់ពីរដ្ឋមន្ត្រីក្រសួងរតនាគារ លោកScott Bessent បាននិយាយថា សហរដ្ឋអាមេរិកនឹងដាក់ការផាត់ចេញផ្នែកសេដ្ឋកិច្ចលើប្រទេសនេះ «ក្នុងកម្រិតដែលពិភពលោកមិនធ្លាប់បានឃើញពីមុនមក»។
ទោះបីជាមានការស្ងប់ស្ងាត់បណ្តោះអាសន្ននៃការវាយប្រហារដោយកាំជ្រួចមីស៊ីលនាពេលថ្មីៗនេះក៏ដោយ ក៏អ៊ីរ៉ង់នៅតែបន្តបិទខ្ទប់ការដឹកជញ្ជូនតាមផ្លូវទឹកប្រកបដោយប្រសិទ្ធភាពឆ្លងកាត់ច្រកសមុទ្រ Hormuz បន្ទាប់ពីកិច្ចព្រមព្រៀងក្របខណ្ឌអាមេរិក-អ៊ីរ៉ង់ ដើម្បីបើកច្រករបៀងដ៏សំខាន់នេះឡើងវិញបានបរាជ័យ។ ក្នុងពេលប៉ុន្មានថ្ងៃថ្មីៗនេះ ភាគីទាំងសងខាងបាននិយាយថា មានការផ្លាស់ប្តូរសាររវាងគ្នានឹងគ្នា ទោះជាយ៉ាងណាក៏ដោយ លោកត្រាំកាលពីថ្ងៃទី១៨ ខែសីហា បានជំរុញថា ការចរចាត្រូវបានលុបចោល ហើយបានបង្ហោះសារនៅលើបណ្តាញសង្គមដោយលើកឡើងថា ច្រកសមុទ្រនេះអាចនឹងក្លាយជា «ដែនដីថ្មីរបស់អាមេរិក»៕(ប្រែសម្រួលដោយ ពិសិដ្ឋសំណាង)