កំពង់ស្ពឺ ៖ កម្លាំងនគរបាលប្រឆាំងគ្រឿងញៀនខេត្ដកំពង់ស្ពឺ ឃាត់ជមសង្ស័យ២នាក់ជាមួយថ្នាំញៀនប្រភេទចម្រុះជាង១០គីឡូក្រាម នៅចំណុចភូមិក្រាំងពង្រ ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ កាលពីពេលថ្មីៗកន្លងទៅ ហើយបានបង្ហាញមុខនាថ្ងៃទី៩មេសាឆ្នាំ២០២៦នេះ។
សមត្ថកិច្ចនិយាយថា អនុវត្ដតាមបទបញ្ជានិងការដឹកនាំដ៏ខ្ពង់ខ្ពស់លោកឧត្ដមសេនីយ៍ទោ ឃឹម សុកខៃ ស្នងការនគរបាលខេត្ដកំពង់ស្ពឺ និងបានការសម្របសម្រួលនីតិវិធីពី ឯកឧត្ដម សុិន វិរៈ ព្រះរាជអាជ្ញា នៃអយ្យការអមសាលាដំបូងខេត្ដកំពង់ស្ពឺ និងការដឹកនាំកំលាំងផ្ទាល់ពីលោកវរសេនីយ៍ទោ ហ៊ាង ឈាងលី ស្នងការរង (ស្ដីទី) ផែនការងារប្រឆាំងគ្រឿងញៀន បានបេីកប្រតិបត្ដិការតស៊ូលេីករណីមុខសញ្ញាចាស់ជាក់ស្ដែង កាលពីថ្ងៃទី៦ ខែមេសា ឆ្នាំ២០២៦ នៅចំណុចភូមិក្រាំងពង្រ ឃុំសង្កែសាទប ស្រុកឱរ៉ាល់ ។
សមត្ថកិច្ចបន្តថា កម្លាំងការិយាល័យប្រឆាំងគ្រឿងញៀន សហការជាមួយកម្លាំងនគរបាលស្រុកឱរ៉ាល់ កម្លាំងនគរបាលស្រុកសំរោងទង បង្ក្រាបមុខសញ្ញាសង្ស័យពាក់ព័ន្ធនឹងគ្រឿងញៀន ឈ្មោះ វង់ ស៊ីថា ហៅ ញ៉ាញ់ ភេទ ប្រុស អាយុ៣៥ឆ្នាំ រស់នៅភូមិជាំ ឃុំតាសាល ស្រុកឱរ៉ាល់ ខេត្តកំពង់ស្ពឺ ដោយដកហូតបានវត្ថុតាងម្សៅក្រាមពណ៌សថ្លាសង្ស័យជាគ្រឿងញៀនចំនួន២កញ្ចប់ធំ, ទូរស័ព្ទ ១គ្រឿង, ម៉ូតូ ១គ្រឿង។
សមត្ថកិច្ចបន្តថា ដោយបានការអនុញ្ញាតបន្ដពីលោកឧត្ដមសេនីយ៍ទោ ឃឹម សុកខៃ ស្នងការ និងការបន្ដនីតិវិធីដោយតំណាងអយ្យការ នៅថ្ងៃទី៧ ខែមេសា ឆ្នាំ២០២៦ វេលាម៉ោង១៥:២០នាទី កម្លាំងការិយាល័យប្រឆាំងគ្រឿងញៀនបានបន្តឆែកឆេរផ្ទះរបស់ឈ្មោះ វង់ ស៊ីថា នៅចំណុចភូមិជាំ ឃុំតាសាល ស្រុកឱរ៉ាល់ ដកហូតម្សៅក្រាមពណ៌សថ្លាសង្ស័យជាគ្រឿងញៀន ប្រភេទមេតំហ្វេតាមីន ចំនួន ៣២កញ្ចប់(ធំ១២,តូច២០) ប្រភេទម្សៅខេ(K)ចំនួន ២កញ្ចប់, ប្រភេទអ៊ឹមឌីអ៊ឹមអេ(MDMA) ចំនួន ៤៩កញ្ចប់, ម្សៅប្រភេទJNX ចំនួន ៦កំប៉ុង, ម្សៅម៉ដ្ឋរូបស្លឹកឈើចំនួន ៤កញ្ចប់ធំ, បារីអេឡិចត្រូនិចចំនួន ៣៩ដើម, ទឹកអាកុលចំនួន ៣លីត្រ, ឧបករណ៍កែច្នៃផលិតគ្រឿងញៀនមួយចំនួន, កាំបិត១ដើម, អាវុធកែច្នៃ ១ដើម, វ៉ាលីចំនួន២, ថង់សម្រាប់វេចខ្ចប់គ្រឿងញៀនមួយចំនួន។
បន្ទាប់មកក្រុមប្រតិបត្តិការបានបន្តទៅឃាត់ខ្លួនឈ្មោះ ឯម ស្រីនា ភេទស្រី អាយុ ៣៥ឆ្នាំ ត្រូវជាប្រពន្ធឈ្មោះញ៉ាញ់នៅចំណុចភូមិត្រស់សាលា សង្កាត់ស្វាយក្រវ៉ាន់ ក្រុងច្បារមន ដកហូតទូរស័ព្ទ ១គ្រឿង ។ផ្អែកតាមចម្លើយសារភាពថាគ្រឿងញៀនបានមកពី ឯ ស ភ ភេទប្រុស នៅភូមិឈូកវ៉ា២ សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ (ត្រូវជាបងបង្កេីតរបស់ ឯម ស្រីនា) តែមុខសញ្ញាគេចខ្លួនក្រោយទទួលដំណឹងពីជនសង្ស័យដែលត្រូវបានបង្រ្កាប នៅខេត្ដកំពង់ស្ពឺ។
ចំពោះជនសង្ស័យទាំង២នាក់ប្ដីប្រពន្ធ រួមជាមួយវត្ថុតាងដែលសមត្ថកិច្ចរឹបអូសបាន កម្លាំងការិយាល័យជំនាញ នៃស្នងការដ្ឋាននគរបាលខេត្ដកំពង់ស្ពឺ បាននិងកំពុងកសាងសំណុំរឿង ចាត់ការតាមនីតិវិធី៕(ដោយ BBN04)
